關於 ai.in.education
呢個網站唔係一個產品，而係一個諗法嘅延伸。
開端：2022 年
ChatGPT 出現之後，我開始諗一個問題：如果知識變得隨手可得，我哋一直以嚟嘅教育模式會變成點？
由果日開始，我一直喺度探索緊呢個問題嘅答案 — 從整合學校數據、到建立個人化學習工具、到帶學生喺機械人比賽入面體驗「自動化」嘅概念。每一樣都係指向同一件事：我哋要點樣裝備學生，迎接一個 AI 無處不在嘅世界。
我信啲咩
我深信 AI 會徹底改變學與教嘅方式。而要令學生準備好面對呢個未來，老師自己要先準備好。裝備自己，先可以裝備到學生。
呢度有咩睇？
有我親身試過嘅工具，亦都有我喺網上收集、覺得適合唔同科目老師用嘅資源。總之用得著先放上嚟。每個工具會講清楚：香港用唔用到？免費版夠唔夠？值唔值得俾錢？
網站冇廣告，冇 sponsorship，冇賣緊任何產品。純粹係一個 frontline 老師邊走邊學，見到好嘢就 share 出嚟。
最後
如果你喺呢度搵到一個 tool 幫你慳返半個鐘，而嗰半個鐘你去咗關心一個學生 — 咁就夠了。
老師慳返啲時間，最終惠及學生。呢個就係成個 site 嘅意義。
— Jerome Tam
jerome@ai.in.education